مساعد, الامير, عبدالرحمن, قصائد
مساعد, الامير, عبدالرحمن, قصائد
قصائد للشاعر عبدالرحمن بن مساعد -مساء الخير-قالوا ترى -الحرامي-البرواز -قصائد مقروءة
السلام عليكم ورحمة الله وبركاته
هذة مجموعه من القصائد المقروءة للأمير الشاعر عبدالرحمن بن مساعد
( مساء الخير - قالوا ترى - الحرامي - البرواز )
اتمنى ان تنال اعجابكمـ..
//
مــســاء الخير
مساء الخير والاحسـاس والطيبة مسـاءٍ مـا يـليق إلا بأحبـابي
مساءٍ غير غصن لطير يحكي بـه عن اللي مـسكنه جفني وأهـدابي
هلا باللي أحـبه كثـر تعذيـبه وكثر ما هـو يغيب وكثر ترحابي
حبيبي هـو ولو ما قصّـر الغيبة ولـو عن بسمتي قد طـوّل غيابي
أعـرفه زيـن وأعيتني أسـاليبه عدوي يوم ويوم أقرب من أصحابي
مـلكني بين تـرغيبه وتـرهيبه يفـارقني وهـو واقف على بـابي
به الصادق به الغـارق بأكاذيبـه يبي بعـدي ودمعـه بـلّل ثـيابي
به القسـوة به الرقـة به الهيبـة به الضعف القوي به نشوة إغضابي
//
قــالوا ترى
قالوا ترى مالك امل في قربها لو يوم
ابعد وجنب دربها ..هذا هو المقسوم
قلت اتركوني واسكتوا..خلو العتب واللوم
قدني غرقت في بحرها..ولاعاد يفيد العوم
قالوا ترى في حبها ويل .. واسى..واهموم
قلت ان قتلني حبها ..حسبي تقول مرحوم
قالوا انسى ذكرها..منتب بها ملزوم
قلت ابشروا ياعذلين..بنسى لذيذ النوم
قالوا بتلقى غيرها..واترك هواها اليوم
قلت العفو ياحسدين ..ما ابدل القمر بنجوم
قالوا لغيرك حبها..قلت الجواب مفهوم
دام انها متهنيه..وشلون اصير محروم
بقضي الليالي انتظر..صابر على المقسوم
متعلق بطرف الأمل .. يمكن يجيني نوم
قالوا ترى مالك امل ..في حبها لو يوم
ابعد وجنب دربها..وهذا هو المقسوم
//
الحرامي
احترامي.. للحرامي
صاحب المجد العصامي
صبر مع حنكة وحيطة
وابتدا بسرقة بسيطة
وبعدها سرقة بسيطة
وبعدها تَعدى محيطه
وصار في الصف الأمامي
احترامي.. للحرامي
احترامي.. للحرامي
صاحب المجد العصامي
صاحب النفس العفيفة
صاحب اليد النظيفة
جاب هالثروة المخيفة
من معاشه في الوظيفة
وصار في الصف الأمامي
احترامي.. للحرامي
احترامي.. للحرامي
صاحب المجد العصامي
يولي تطبيق النظام
أولوية واهتمام
ما يقرب للحرام
إلا في جنح الظلام
صار في الصف الأمامي
احترامي.. للحرامي
احترامي.. للحرامي
صاحب المجد العصامي
يسرق بهمة دؤوبة
يكدح ويملي جيوبه
يعرق ويرجي المثوبة
ما يخاف من العقوبة
صار في الصف الأمامي
احترامي.. للحرامي
احترامي.. للحرامي
صاحب المجد العصامي
صار يحكي في الفضا
عن نزاهة ما مضى
وكيف آمن بالقضا
وغير حقه ما ارتضى
صار في الصف الأمامي
احترامي.. للحرامي
احترامي للنكوص
عن قوانين ونصوص
احترامي للفساد
وأكل أموال العباد
والجشع والازدياد
والتحول في البلاد
من عمومي للخصوص
احترامي
للصوص
//
البرواز
قلتيلي انسى
ومن يومها وانا كل ليلة..قدامي البرواز
حبر العيون ودمع القلم.. في دفتري
وصورتك..رغم الألم..ورغم انها خذت من اطباعك كثير
وخانت البرواز..اشوفها في خاطري
حبيبتي مابيدي حيلة
لاصرتي الصورة..وعيوني البرواز
وشلون ابنسى
اتعبتي الصوره مشاوير
وتعبت انا بلقى لغدرك معاذير
وصورتك اللي سجنت بروازها طول السنين..
كانت جسد وبروازها الروح
ويوم انزعت منها الجسد..تجرحت اطرافها
وبجروحها راحت لمين؟
لبروازها الثاني!!
مسكين..بيسجنك ويبقى سجين
مسكين
تشبهلك اقداره..خانته
وصورتك يجي يوم وتخونه
حبيبتي..أو للأسف حبيبته
لاصرتي الصورة..وجفونه البرواز
وشلون ينسى
حبيبتي لجل أنسى جرحك واستريح..ببكي
وبعد البكى ..ببكي
وأكيد في لحظة بتجي..وبيجف دمعي
وعندها صورتك اللي في عيوني
بتموت من ظلم العطش..
بروازها بيصبح نعش
وبتمرني الدمعة الأخيرة ... تاخذ معاها صورتك وتطيح
وكني بالمسافة تطول مابين عيني..ودمعتي..وخدي
وكني بقلبي الحاير المسكين
نبضه يقول لا تودع الفرقى الدمع مايرقى
وعندها لانزلت الدمعة لمثواها الأخير
وفارقت وجهي
بغمض عيوني..واكسر البرواز
« آخـــر الـــمـــشـــاركــــات »
25-07-2012
قصائد الامير عبدالرحمن بن مساعد
