ابراهيم يرى في نفسه وسامة وملح وكثير ما زار المراية .
ويعمل في احد الممثليات في دول الخليج .
يخرج الصباح ويدير محرك سيارته bmw ويطيل انتظار تسخين المحرك حتى تخرج بنت جيرانهم ذات العشرون ربيعاً الى سيارتها التي تقف في البراحة بجانب سيارته .
يتنظارون بالعيون دون سلام ولا كلام الكل في خجل.
وابراهيم تزداد خفقات قلبه عند نظرها تجاهه وعند رفع صوتها لشقيقتها .
يركز كل حواسه في سمعه حتى يسبح مع الصوت الرخيم اللي تتعمد السحب في خواتيم كلامتها فيجر تنهيدة مع خاتمة الحرف.
طالت السيرة على هذه الحالة ايام واسابيع بس بالعيون ولا تقدم .
وزاره صديقه ناصر سائحاً وبات عنده ليلة وفي الصباح اراد ان يذهب معه للمكتب.
وشاف ناصر غزال بري يخرج من منزل الجيران.
فسحب كم ابراهيم شف شف.
قال ابراهيم استح بنت جيرانا وحنا اجناب لا تفضحنا وياغريب كنا اديب.
قال ناصر اروح ملح واتقطع فتافيت ويسفني الهواء.
نهره ابراهيم عيب .
انتبه ناصر للرزانة اللي عليها ابراهيم .
وقال وش فيك عاقل ماخبرتك كسذا ؟.
ابداً ابداً مافيه بس الجيران لهم حق !!!.
علامات تعجب على وجه ناصر.
وقال الأمر ماهو طبيعي شف اذا قليبك يرقل ترى انا طبيب الهوى لا تستحي فق ثمك وانا لها.
تنهد ابراهيم وانطلق بالسيارة لمكتبه ومصرحاً بمكنونه .
لي مدة وحنا نتطالع بالعيون ولا أحد تقدم خطوه .
قال ناصر خلاص بأجل سفري يوم لين أعالجك يالمصخن .
وشلون تكفى الحق علي؟ .
قال ناصر الصباح رباح بكره بداية الدواء.
وليلتها يطولها من ليلة على ابراهيم أهي حلوم أهي كوابيس .
قام الصبح وجهز الفطور من كبده وفول وشاهي وحليب سايل وسخن الخبز على الفرن بعدما طلعه من الفريزر.
أفطر ناصر وابراهيم .
ويطلع ناصر هاك الورقة مزركشة من شنطته.
وقال عطني طيبك .
قال انا طيب معك .
قال ياخي عطرك أف منك.
ومد يده بقارورة الفرنش لاين.
ورش ناصر على الورقه وهفهفها لين نشفت .
ويكتب رقم تيلفون ابراهيم وحرف I.
قال قم مشينا للدوام.
واطلعوا للسيارة وانتظروا فيها دقايق لين طلعت الشمس من بيت جيرانهم .
قال ناصر خذ الورقه ذي وذبها عليها في السيارة وارجع ولا تكلم شيء .
قام ابراهيم يرقل من الرعب وشلون ماقد سويتها.
قال ناصر جمد قلبك كلها ثواني ولا ترتبش وتطيح الورقة في الشارع يطيرها العج.
نزل ابراهيم ويمر من جنب سياراتها ويقرب .
تدنق هي خجله ويرمي الورقه قائلاً دوسك .
رجع وركب سيارته ومشى كل منهم في طريقه .
ابراهيم ساكت وناصر يطالع فيه .
وشبك عسى ماجاك سكتة عبر عن شعورك .
راحوا للمكتب والساعة اثنعش ارسل ناصر للمطار مع السواق حق المكتب.
ورجع الظهر للبيت وبدء يركب غداه الا والتلفون يرن
يتبع
ساعد في نشر والارتقاء بنا عبر مشاركة رأيك في الفيس بوك
2
وارفع السماعة ولا صوت شهق معه.
وطاحت السماعة ويلقطها من الارض الوووووه نعم .
قالت من انت ؟
قال من انتي؟
قالت بنت جيرانكم!!.
قال أي جيرانا ؟
قالت كم معطي رقمك ياللعاب؟
قال اووه اسف بس وشلون اتكد انه انتي.
قالت اطلع في البلكونه وطالع في الشارع.
قال خليس على الخط .
ينقز للبلكونه الاوهي تشر بيدها وورقته معها .
يرجع للتلفون الووووه يانا في حلم ولا علم .
قالت لاعلم وش بك مانت مصدق وش الجسارة فيك اليوم يقوو قلبك.
قال ماهو مني ولا انا قلبي رهيف بس زميلي الشيطون هو المخطط اثري ضيعت عمري .
قالت وش الحرف اللي كتبته قال ابراهيم اسمي قالت عاشت الاسامي وش هالعطر الحلو.
قال من ذوقك.
قالت في امان الله اهلي جو.
قال وش رقمك وش اسمك.
قالت بعدين بعدين مع السلامه.
بعد هالمكالمه احتاس ابراهيم وش السواة وشلون اعرف رقمها؟
بدء مع راعي البقاله اللي جنب البيت وسأله بحرفنه وش اسم الشايب أبو عزيز ( أخوها عزيز يعرفه لأنه خياط بدل في السوق) .
ماعلمه راعي البقاله لأن ناس كثير قد سألوه نفس السؤال.
وفي الليل لقى واحد من شباب الحارة في مقهى الفندق اللي يمسي فيه .
جلس معه وعزمه ومع الدردشه يسحبه في الهرج عن الحارة الا والأخو يقول له أكيد طايح مغزلجي مع بنات جيرانك .
قال ابراهيم وول يالشين حتى انت حاط عينك أكيد قد اتصلت عليهم.
قال لا عسى رقمهم عندك.
قال ابراهيم في نفسه ضف وجهك عزيمه وصابرن عليك وتاليتها ارنب تدور العشا والعشا في ظهرها يأني مغفل ذا وجه مغازل حده السكيك وتخب عليه .
جاء الصباح واشتغلت السيارات .
حرك ابراهيم سيارته وقف جنب سياراتها وقبل يتكلم رمت عليه ورقه.
اخذها بسرعه ومشى برا الحارة .
وقف السياراة وطالع الورقه وفيها.
رقم تلفوني (000000) محبتك A .
ويقرب الورقه من وجهه ويسحب ذاك النفس العميق، ياربيه يوووه يازينها من ريحه.
ويجلس في المكتب بس يطالع الساعة وشهو اسمها وهالحرف اللي كاتبته أهي أمل أحلام إبتسام وشو وشو؟
طلع من المكتب بدري نصف ساعة وطيران على البيت ماله نفس يسوي غداه .
على التلفون واتصل وترد هي ،،،
مرحبا ماأدري احلام ولا ابتسام ولا أمل .
قالت ولا واحدة منهم أنا أميرة .
قال صسدق أميرة القلوب .
قالت ياهوه .
قال تصدقين ماشتغلت ولا معاملة اليوم بس انطر هالوقت.
قالت ولا انا.
قال ابغى اشوفك .
قالت كل يوم نتشاوف مايكفي .
قال نطلع بحر وندردش .
قالت بدري على ذا الكلام هذا بعد الخطبة .
قال أف خطبة .
قالت أجل وش ظنك لعب اذا تبي تكمل درب الحلال زين .
قال طيب نجلس مع بعض مرة نتعارف ونتكلم عن انفسنا .
قالت دونك الخط قول... أهلي برا البيت.
قال أجي ؟.
قالت لالالا مهبول انت .
قال خلاص خاطبك اليوم خاطبك ماعاد أقدر أصبر .
قالت مع السلامه خل حكي لبكره .
قال تونا بادين قالت مع السلامه مع السلامه.
راح لمدرس سعودي يعرفه موفد للتدريس في هاك البلد.
تكفى يابو عبد الرحمن الحقني اخوك يبغى نجدتك .
قال أبشر وش السالفه.
قال السالفه حبيت وباعرس على بنت جيرانا .
قال طيب بنت عمك اللي حاجزها عمك لك .
قال يارجال ذي قمر وبنت عمي تقل عمي بس بدون شنب .
قال ولو بنت عمك وتنتظرك.
قال بتروح معي ولي أمر في الخطبة ولا ادور غيرك .
قال الشكوى لله بروح وانا ماني راضي متى تبينا نروح .
قال هالحين مشينا .
قال ابو عبد الرحمن طيب نروح نكشخ .
قال ابراهيم يارجال رايحن تغازل أمش بس .
وراحوا لبيت الخطيبة وطقوا الباب .
ويطلع عزيز عليهم اهلا ومرحبا تفضلوا.
قالوا بس الوالد فيه.
قال لاوالله ماهو موجود.
قال ابو عبد الرحمن خلاص نجي يوم ثاني.
قال ابراهيم يارجال وراك عجل بنقلط ويجي.
قال ابو عبد الرحمن لالا مشينا واعلمك.
ركبوا في السيارة .
قال ابو عبد الرحمن ياخي خيره انا مالقيناه فكر لاتستعجل تراك تمشي بقلبك ماهو بعقلك فكر بهدؤ ان كان الزين سحرك حضر الفكرة بعدما تروح السكرة .
قال ابراهيم وش تهذري انت سكرة وخمرة ياخي احبها وابيها الظاهر بشوف واحد من المدرسين غيرك.
قال أصبر وراك صابر تسعة أشهر في بطن أمك ماتصبر ساعة نتفاهم.
قال على ويش نتفاهم ماعندك سالفة .
قال ابو عبد الرحمن تعال لبيتك وتعوذ من ابليس .
تفضل قالها ابراهيم ودخل ابو عبد الرحمن .
قال لا شاهي ولا قهوة اقعد واسمعني .
ها وش عندك يالله .
قال ابو عبد الرحمن طع شوري لاتعجل اعرف ان كلمت والدك يمكن يرفض بس كلم الوالدة وخذرأيها وبعدين نتصرف على ماتسمع من والدتك .
قال ابراهيم الوالدة حبيبة وبتوافق أكيد.
قال ابو عبد الرحمن كلمها وقللي بكرة.
قال ابراهيم ايا بكرة ياصابر التلفون قريب وبتصل بالوالده .
الووه السلام عليكم مرحبا عساكم طيبين وشلون الوالدين
عطيني الوالدة هي عندك ….
السلام عليكم يالله حي ام ابراهيم مشتاقين…..
طيب جعلك سالمة وشلون ابوي ……
الله يرضى عليك عندي طلب ياليت تساعديني يام ابراهيم……
ابد سلامتك بس وليدك يحب بنت الجيران…
ليه الله يرضى عليك بدينا …
يامي بنت ناس وزينه وبتعجبكم …
وشهوله الوالد ابغي موافقتك تكفيني الله يخليك لي…
الووووه الوووه …
وش فيها الوالده وش صارلها …
خلاص قولي لها جاي على اول طيارة،،،،
هاه بركاتك يابو عبد الرحمن الوالدة تعبت.
قال ابو عبد الرحمن هذي البداية زين انك كلمتها قبل ماتسوي شي.
مع السلامه انا رايح تروح وترجع بالسلامة.
وصل البيت وتقابله اخته .
سلامات على الوالدة وش صار.
قالت ابد سلامتك بس الخطة نجحت عليك ياحلو وجابتك على وجهك .
قال وشو أي خطة واي بطيخ .
قالت الوالدة طيبة ولا بها الا العافية بس تبيك تجي علشان تمصع اذانك وش الكلام حبيت وطبيت والسوري من ياخذها يالدرو.
قال يالله هناك بس .
ويدخل يسلم على ابوه وامه وشلونكم عساكم طيبن الله يهديك بام ابراهيم وش هالكلام خوفيتني عليس يعني لازم ترجين قلبي ماترين باس.
قال ابوه ابد امك طيبة بس اسمعت كلامك وقالت مالها الا كسذا علشان تعقل .
قال يابوي الله يخليك لي ولا يحرمني شوفتك القلب وماحب وين سوالفك عن مغازلك للوالدة قبل تاخذها وحبك وانك فرضت امرك على اهلك.
قال ابوه وانت صدقت كلام السمرا ت لو اعيي على والدي كان خفس بي القاع اعقل بس.
بس يابيي البنت بنت ناس وعرب ومسلمين ومستترين .
قالت أمه وشلون مستترين وشلون شفتها .
قال ابد سيارتها جنب سياراتي في البرحة .
قالت أمه بعد سيارتها وتسوق!!! وين اودي وجهي من الناس انت تبي تذبحني ؟.
سلامتك الله يرضى عليك.
قال ابوه اسمع كلام يدخل باذنك ويقر بقلبك زواج من برا مافيه وبنت عمك مالها الاانت وواسطة دورتها علشان ننقلك تشتغل برا ترا أدورها هالحين علشان ترجعك وش قلت؟ .
قال ابراهيم طيب الله يطول في عمرك وسع صدرك نتفاهم وراك عصبت الله يحييك؟
قال ابوه هالامور مابها تفاهم .
طلع العصرية وراح لصاحبه علي.
ياعلي ابي منك الدبره وش السواة الامور تعقدت.
قال علي وش الامور تراك اخذتني على مشمي .
قال ابراهيم السالفه جيت بتزوج من جيراني في ديرة عملي والوالدة خربت الموضوع وعلمت الوالد اللي هدد ان تزوجت من برا رجعني لوزارتنا .
قال علي أثرك منتب بسيط يابرهوم حب من اول نظرة وطرت في العجة باعرس !!.
قال ابراهيم ليه مستغرب انا اول واحد ولا آخر واحد شف العالم وش كثرها متزوجة من برا ولا وقف النصيب عندي .
قال علي بس انت امرك بيد اهلك .
قال ابراهيم كنك تشجعني اسوي اللي برأسي ولا علي من احد .
قال علي ماهو كذا بس اخطب البنت وخل الخطبة تطول لين تعرف راسك من كرياسك وتشوفها على طبيعتها ماهي المكيجه المدهرة .
قال ابراهيم رأيك أسمه راشد خلاص لقيتها لي.
رجع ابراهيم للبيت .
وتلقاه أمه وراك عجل.
قال سلامتك بس بارتب شنطتي راجع لعملي.
قالت وراك وش بتسوي .
قال تعوذت من ابليس مالي الا بنت عمي .
قالت يابو ابراهيم اسمع ولدك وش حلاة هرجه.
وجا ابوه قال رجال وعاقل بس باقي لك شيء واحد وتزين أمورك.
قال ابراهيم وشو؟.
قال نجيب المملك ويكتب لك على بنت عمك ثم سافر بسلامتك .
قال ابراهيم في نفسه ( اما يموت الوزير او يموت الحمار ) اللي تأمر به يبه انا تحت طوعك .
قال ابوه تسلم ياوليدي خلاص اكلم عمك ونكمل الملكة انشاء الله.
وصل ابراهيم شقته .
وللتلفون يرن الووه هلا بهالصوت زين انه اول صوت سمعته يالله حي أميرتي .
قالت وينك غبيت اكيد سافرت لاهلك .
قال صحيح الوالدة تعبت ورحت اطمئن عليها.
قالت سلامتها من كل باس خالتي.
قال خالتي يازينها في فمك تصدقيني اشم ريحة عبير الكلمات مع التلفون.
قالت يانماك تعلمت الكلام الزين في يومين وينك قبل تسافر وانت تعتع .
قال من يسمع هالصوت تنفتح نفسه للكلام يانا مشتاق لك ترا بنجي نخطب رسمي انا وزميلي يعني انه ولي امري ابو عبد الرحمن .
قالت لاتجي حتى اردلك خبر ،قال متى لاتطولين ترى ماعندي صبر .
في الليل رن التفون.
وشاله ابراهيم الووه اهلا عزيز كيف الوالدين طيبين .
قال عزيز هلابك بس سلامتك.
قالت أميرة للوالدة انك بتخطبها ودي اقابلك بكرة واوضح لك الأمر.
قال ابراهيم خلاص تجيني المكتب .
قال لا ابيك برا.
قال الصباح قبل اروح المكتب انتظرك .
قال عزيز أوكيه .
في الصباح دق جرس الباب وطالع ابراهيم مع العين السحرية الا هو عزيز.
وفتح الباب تفضل يابو نسب يالله حيه .
وجلس عزيز قال يابراهيم الوقت ضيق مابغي اعطلك عن مكتبك بس الأمر بصراحة من ناحية زواج اميرة ماني موافق.
قال ابراهيم ليش قال عزيز لامور كثيرة منها انت شاب غريب عنا واذا كان تبغى تتسلى بالبنت في الخطبة وبعدين تفركشها فعندي لك اجمل من أميرة ،،،.
غضب ابراهيم قال لو ماأنت في بيتي كان دست على خدك وش تحسبني شايفيني سربوت لكن ياعزيز لوكنت مثل ظنك القبيح كان مادخلت مع الباب فانا عندي شقتي وسيارتي واقدر اصيد اختك بس انا ابيها في الحلال .
قال عزيز الامر الثاني وش يضمن انك ماتاخذها فترة ثم ترميها لازم تضمن لها شيء .
قال ابراهيم اللهم طولك ياروح وش شايفيني انت مين ،،الأخو متأثر بالافلام المصرية ؟؟كل العالم تزوج والظامن الله ولا تبي مؤخر صداق يابيه؟ ، .
قال عزيز والأمر الثالث نبي والدك يكلم الوالد ماهو لازم يكلف نفسه ويجي .
قال ابراهيم خير انشاء الله باقي طلبات ياعزيز ترا فرصتكم رجال شاريكم وانتم بايعينه.
قال عزيز لابس لاتأخذ بخاطرك ترى ذا عادي.
قال ابراهيم أي عادي وأي سوبر يصير خير .
راح ابراهيم للمكتب قافلن بليتينه وضارب بوز ودخل المكتب وقفل الغرفة وجلس يضربها أخماس في اسداس (ماطلعت ثلاثين ) وش السواة ورط الخبلو،،،،
السوري وملكنا عليها وأميرة بتطير من قدامي بسبة عزيزوه هالماسخ …..
ويلقط التلفون ويكلم علي،
ياعلي يابو العريف ورطتني خلصني.
قال علي وش ورطتك متى المعرفةكخخخخخخ لابس أمزح ابشر مالقيت الا طبيب القلوب العليلة وش صار .
قال ابراهيم بنت عمي وتملكت عليها وانت ووجهك من الشهود وحب قلبي شرطوا شروط قشرا.
قال علي وش هي قال اول الوالد يكلمهم وثاني مؤخر صداق .
قال علي بس ياحالتك بسيطة قياساً بحالة سلوم ولد العلي .
قال ابراهيم وش علي من سلوم وش حل حالتي .
قال علي انا ابوك يالخبل.
قال ابراهيم وشلون.
قال علي انا ابوك أهم يعرفون ابوك ولا صوته يالدرو .
قال ابراهيم لا .
قال خلاص ان ابوك وامك بعد ان بغيت كلها تهون علشانك يابراهيم .
قال ابراهيم اجل خذ رقمهم بس كلم وقت دوامنا لاتكلم في المساء ثم امخ رقبتك .
قال علي أيه هين صيده ولقيناهاكخخخخخخخخخ وبالنسبة للمؤخر مايراح يكتب الا في كتب الكتاب عندهم ولا الخطبة مافيه شيء قل هين وامركم ياخوالي.
طلع ابراهيم للبيت وجلس يفكر في الوضع وقال لنفسه تالية الكذب على الناس ابوي واهلي وعمي وبنت عمي وأميرة واهلها ثم أن هالخبل علي يده ماهي في النار مثلي والورطة علي …..
الصدق زين ولو صار ماصار ، أنتظر فترة.
واتصل على أميرة : مرحبا أمورتي .
قالت مرحبا بك وش العلوم ياسلوم .
قال علومي سلامة قلبك ابغي تسمعين مني كلام جديد عليك شوي بس التلفون مايصلح لان فيه ضحك ودموع وودي اشوفك في الكورنيش عند المرسى بس علشان اشرح كل الامر .
قالت الأمر خطير.
قال لالا لاتنزعجين بس ابي اشوفك وبس .
قالت خلاص ساعة بالضبط وانا هناك اشوفك على خير …
نزل السماعة وبدء يرتب افكاره وش يقول وش يخلي .
قال مالها الا الصدق وبس واللي مكتوب بنحصله.
وصل للكورنيش قبلها وبعد شوي وصلت ومعها اختها ونزلت لوحدها من السيارة.
ورجف قلبه قال تصدقيني كأني في حلم ماودي هالخدره اللي برأسي تروح من شوفتك .
قالت جايبني تغزل ماعندك التلفون.
قال اخاف قلبي يطير من قربك لي يازين الاحلام ليتها طول بس .
قالت وش بسه .
قال اجلسي معليش بنطول شوي على اختك ابروح اسلم عليها واعتذر لها .
وراح وسلم ورجع .
قالت وش الامر .
قال في البداية باقولك وش صار في البداية انت عندي اغلى من روحي ولا ابغي بدالك في هالدنيا وعلشانك اضحي بالغالي.
قالت يويو ياهو أمر خطر انا حاسة بكل اللي تقوله بس ادخل بالموضوع .
قال انا رحت للوالدة وكنت احسبها تعبانه وهي كانت ماتبيني اتزوج من برا وصار من الوالد تهديد انا اذا ازوجت من برا بيرجعني للسعودية وشرط علي انا مارجع لكم هنا الا اذا ملكت على بنت عمي اللي محجوزة لي من زمان.
قالت يعني بدت علاقتنا وانت عارف ان بنت عمك لك .
قال نعم بس ماتوقعت اصرار اهلي ثم الآن أخوك عزيز يشرط الوالد يكلمه وانت عرفتي استحالة ذا وانا بين ناريين احبك ولا اتنازل عنك ونار أهلي فكوني جنتي لاتكونين ناري،،،،،،
هلت دمعة أميرة وهي ساكته .
ومد يده لوجها أول مرة ومسح دمعتها.
قال أفديك بعمري تراي ماأستاهل دمعة وشلون بدموع لاتزودين حرقتي وحيرتي .
ماتكلمت الا بدموعها وركضت على سياراتها وانطلقت فيها .
وهو مذهول وش سويت انا على صح ولا غلط وش اسوي وراح يمشي على البحر سارح فكر يوديه وفكر يجيبه ورجع لسيارته وراح لشقته .
ثاني يوم انتظر بالسيارة وطال انتظاره وسياراتها محلها .
وراح للعمل واتصل على تلفونها ورفعت السماعة .
وقال الوووه ماأحد رد وقفلوا السماعة.
قال الله اكبر انعفسنا لواني طايع علي كان مستأنس لالالالا الصدق اريح انا ماكذبت واذا هي تبيني اهلا بها واذا ماتبيني هذا نصيبي .
رجع للبيت واتصل عليها وردت اختها .
قال اكلم اميرة .
قالت ماتبي تتكلم معك رجاء لاعاد تتصل .
قال ليش علشاني صادق تعاقبوني اجل لو كذبت عليكم كان تقبلون بي .
قالت لا تتصل من فضلك خلاص .
قال اسمعي كلمتي ابتصل لين اسمع اميرة واذا عندكم شيء سووه انا ماني مجرم .
قالت آسفة لاتتصل.
قال علمتك متصل متصل الله لايعوق بشر .
الا وأميرة تكلمه أسمع يابراهيم انا فكرت بعقل ووزنت الأمر شف يابن الناس أحلف لك بالله عن محبتك عندي وزادت بعد صدقك معي بس انت خلاص مرتبط ببنت عمك ولا لها ذنب انا عرفت مصيري مايمكن أدخل على غيري ولاأرضى تضر بنت عمك بسببي.
قال يأميرة انتي عارفه وش انتي عندي وش بنت عمي بس لا تستعجلين في الحكم عطينا فرصة يمكن تتغير الأمور .
قالت وشلون ظنك يابراهيم بنت عمك وزوجتك شرعاً واللي بقلبي بأشيله وأنت أقبل نصيبك ولا تفكر اني بأرضى أخذ حق غيري وهذا شيء مارضاه لنفسي .
قال طيب خلي باب الامل مفتوح .
قالت حرام عليك يابراهيم نعذب بعض وحنا أمرنا حسمه غيرنا بلاش نزود في الخطأ والطريق واضح ، أقسم لك بالله انه قرار صعب ومتعبني بس هو الصواب.
فأرجوك أرجوك وأسألك بغلاي عندك تقفل هالباب .
قال يأميرة تطلبين صعب انتي حبي وحلمي وهوائي اللي أشمه ترا طلبك قتلي ياأميرة .
قالت ابراهيم أسمع مني كلام العقل وراجع نفسك والله يبارك لك بنت عمك ونفسي عليك سامحة وعسى الله يعوضني .
قال اعوذ بالله من الشيطان الرجيم مع السلامه قالت مع السلامه.
جاء الصيف وسافر ابراهيم في اجازته ولقى أهله مرتبين أمر زواجه من حجز قصر الافراح والكروت وخلافه .
قال لابوه وراكم مستعجلين.
قال خير البرعاجله وزفوه على بنت عمه ولما دخل عليها.
قال السلام عليكم ماردت عليه خجلانه .
قال في نفسه وش الخجل أبد عمي على حصاه بس بدون شنب طبق الاصل من ابوها ورا ماجذبوها خوالها ،،،،،
نصيب لازم يصيب وجلس ثلاثة ايام وسافر مع زوجته لمقر عمله ووصل شقته .
ولما نزل من التاكسي ولا العين بالعين وطالع فيها وانزلت من سياراتها تركض للبيت مسرعة واصفقت بالباب بقوة ودخل شقته
وقالت زوجته أشيل معك الشناط قال أدخلي بس للشقة خلي الشنط علي .
طلع من البيت بعد ما أرتاح شوي وراح للمطعم بيجب أكل
وأخذ التلفون وأتصل على أميرة ورفعت السماعة قال الووه وقفلت الخط وثاني يوم أنتظر عند السيارة ماأحد جاء وثالث يوم ماأحد جاء ولما رجع الظهر لقى عزيز
وقال وش اخبارك عزيز
قال عزيز الله يسامحك يابراهيم الوالدة تدعي عليك تقول أنك سبب ماصاب أميرة
قال وش صابها
قال عزيز أميرة في المستشفى من أمس العصر
قال أبراهيم مع السلامه عزيز
وانطلق للمستشفى وسئل في الاستقبال عن غرفة أميرة ولما وصل عندها سئل الممرضة عن المريضة لوحدها والا معها مرافق
قالت لوحدها وطرق الباب
ودخل السلام عليكم أميرة طالعت بعيون شاحبة
قالت ابراهيم قال نعم يابعد عمري كله سلامتك
قالت الله يسلمك
قال وش الأمر قالت مافيه شيء فلو بس
قال كيف فلو وانتي من أمس في المستشفى لالالا
قالت يابراهيم انت بلاي وماقدرت أتحمل أشوفك مع غيري
قال انا قلت لك لاتقفلين الباب وخليتني أتصرف بدون تروي وأكمل زواجي على بنت عمي عقاباً لي ولك وهالحين وش بنسوي وحنا عارفين علتنا
قالت ماعندي كلام جديد الله يبارك لك بنت عمك بس لي طلب
قال يفديك عمري
قالت يسلم عمرك تغير شقتك بعيد عنا الله يرحم والديك الا ان كان ودك تعذبني كل يوم
قال ودي ولا ودي يعني ودي اغير الشقه علشانك وعلى شان بنت عمي ولا ودي انحرم من شوفتك.
قالت لي طلب أخير
قال وشهو
قالت تسامحني
قال ليه الكلام ذا
قالت أحس انه آخر مرة أشوفك
قال تعوذي من ابليس
قالت نفسي واحس مابين ضلوعي
قال لالا تتكلمين هالكلام .
انفتح الباب وادخلت أمها واختها وسلم عليهم ابراهيم وخرج ووقف عند الباب شوي
الا ويسمع امها تقول وش يبي منا ماكفاه ماسواه جاي يكمل عليها حسبي الله ونعم الوكيل
وخرج من المستشفى مصدوم وراح لشقته
وبعد ساعة دق التلفون
الا والمتصل عزيز الووه ابراهيم
قال نعم ياعزيز خير
قال بس ابلغك ان أميرة توفيت في المستشفى
« آخـــر الـــمـــشـــاركــــات »
16-01-2016
