حاسب من الأحزان و حاسب لها
حاسب علي رقابيك من حبلها
راح تنتهي و لابد راح تنتهي
مش انتهت أحزان من قبلها ؟
عجبي!!!!
يأسك و صبرك بين إيديك و انت حر
تيأس ما تيأس الحياة راح تمر
أنا دقت مندا ومندا عجبي لقيت
الصبر مر ويرضك اليأس مر
عجبي!!!!
ولدي نصحتك لما صوتي اتنبح
ما تخفش من جني و لا من شبح
و إن هب فيك عفريت قتيل اسأله
ما دافعش ليه عن نفسه يوم ما اندبح
عجبي!!!!
ولدي إليك بدل البالون ميت بالون
انفخ وطرقع فيه علي كل لون
عساك تشوف بعينك مصير الرجال
المنفوخين في السترة و البنطلون
عجبي!!!!
خوض معركتها زي جدك ما خاض
صالب و قالب شفتك بامتعاض
هي كده...ما تنولش منها الأمل
غير بعض صد ورد ووجاع مخاض
عجبي !!!!
كام اشتغلت يا نيل في نحت الصخور
مليون بئونه وألف مليون هاتور
يا نيل أنا ابن حلال و من خلفتك
و ليه صعيبه علي بس الأمور
عجبي !!!!
على بعد مليون ميل من أرضنا..
من الفراغ الكوني بصيت أنا .......
لا شفت فرق بين جبال وبحور.......
ولا شفت فرق ما بين عذاب أو هنا....
عجبي!!!!
حقرا وفوق كوكب حقير محتقر
فى الكون تكون دنياكو إيه يا بقر
رملايه من صحرا ؟... لكين إيش تقول
والكون بحاله جوه عقل البشر
عجبي!!!!
دي مذكرات وكتبتها من سنين..
في نوتة زرقا لون بحور الحنين....
عترت فيها..رميتها في المهملات...
وقلت صحيح أما صحيح كلام مخبولين..
عجبي!!!!!
عاد الربيع كأنه طعم الحب
والحب نار جوه العروق بتصب
أتمتع ازاى بيه وأنا متقطع
من كتر خوفي لا فى الخطيئة يطب
عجبى !!!!
أنا اللي بالأمر المحال اغتوى..
شفت القمر نطيت لفوق بالهوا..
طلته ما طلتوش إيه انا يهمني....
وليه ...ما دام بالنشوة قلبي ارتوى.
عجبي!!!!
يأسك وصبرك بين إيديك وانت حر
تيأس ما تيأس الحياة راح تمر
أنا دقت مندا ومندا عجبى لقيت
الصبر مر وبرضك اليأس مر
عجبى!!!!
علم اللوع أضخم كتاب في الأرض..
بس اللي يغلط فيه يجيبه الأرض.....
أما الصراحة فأمرها ساهل .............
لكن لا تجلب المال ولا تصون العرض...
عجبي!!!!
يا باب أيا مقفول ..إمتى الدخول
صبرت ياما واللي يصبر ينول
دقيت سنين ... والرد يرجع لي :مين؟
لو كنت عارف مين أنا ..كنت أقول
عجبى!!!!
أنا كان لي أب وكان رئيس محكمة..
ستين سنة ..في قضية واحدة أترمى..
ستين سنة وطلع براءة وخرج...............
يشكى الحياة والموت لرب السما ..........
عجبي!!!!
البط شال عدى الجبال والبحور
ياما نفسي اهج ...أحج ويا الطيور
أوصيك يا ربى لما أموت .....والنبي
ما تودنيش الجنة ...للجنة سور
عجبى !!!!
ولو اتضنيت وفنيت وعمري انفرط..
مش عاوز الجأ للحلول الوسط.......
وكمان شطط وجنون ما نيش عاوز...
يا مين يقول لي الصحفيين والغلط.....
عجبي!!!!
كروان جريح مضروب شعاع م القمر
سقط من السموات فؤاده أنكسر
جريت عليه قطه عشان تبلعه
أتاريه خيال شعراء وما لهوش أثر
عجبي!!!!
قالو السياسة مهلكة بشكل عام..
وبحورها يبني خشنة مش ريش نعام..
غوص فيها تلقى الغرقانين كلهم............
شايلين غنايم.... والخفيف اللي عام........
عجبي!!!!
دخل الشتا وقفل البيبان ع البيوت
وجعل شعاع الشمس خيط عنكبوت
وحاجات كتير بتموت فى ليل الشتا
لكن حاجات أكتر بترفض تموت
عجبي!!!!
أنا قلت آه..سمعوني قلوا فسد..
ده كان جدع قلبو حديد واتحسد..
رديت على الايمين أنا وقلت ..آه...
لو تعرفوا مني زئير الأسد.............
عجبي!!!!
يا ملونين البيض فى شم النسيم
لون الحنين والشوق وخمر النديم
ماتعرفوش سايق عليكو النبي
تلونو الأيام بلون النعيم
عجبى !!!!
بين موت وموت ..بين النيران والنيران..
ع الحبل ماشيين الشجاع والجبان.......
عجبي على دي حياة......ويا للعجب........
إزاي أنا.....ياتخين..... بقيت بهلوان..........
عجبي!!!!
أنا إله الوجد رب الهيام.............
أضرب بسهم الوهم وهم الغرام....
وهم الغرام من كتر ما هو لذيذ.......
رشقت أنا ف صدري جميع السهام...
عجبي!!!!
حتة محارة وجدتها فى يوم لقية
قالت لي شوف كيف الطبيعة شقيه؟
نظرت للكهف اللى فيها ولقيت
إن الطبيعة كمان ...لا أخلاقية
عجبى !!!!
آه لو أنا ومحبوب جزنا الفضا..
في سفينة وحدينا واشيا رضا..
ساعة صفا تعجبنا نرجع لها......
والهم قبل ما بيجي يبقى مضى..
عجبي!!!!
يا نجم ....نورك ليه كده بيرتجف؟؟؟
هوا انت قنديل زيت ؟...أو تختلف؟؟
أنا نجم عالي ...بس عالي قوى
وكل ما انظر تحت أخاف انحدف
عجبي!!!!
مزيكه هاديه الكون فيها انغمر
وصيف وليل وعقد فل وسمر
ياهل ترى الناس كلهم مبسوطين
ويا هل ترى شايفين جمال القمر
عجبي!!!!
الموج تلول تهبط وتطلع تلول
يا بحر خدني الشط صاحبك ملول
والا بلاش الشط ح اعمل به إيه
ده ريحته طحلب مهرى وأم الخلول
عجبي!!!!
إيديا في جيوبي وقلبي طرب
سارح فى غربه بس مش مغترب
وحدي لكين ونسان وماشى كده
وبابتعد ...ماعرفش ...أوباقترب
عجبي!!!!
نظرت فوق للنجوم وأنا ساير..
رجليا عترت في الحفر والحجاير..
بقيت أقول وأنا ع التراب ..يا سلام..
مش بس عبرة أنا أخدت لكن عباير..
عجبي!!!!
عيني رأت مخلوق فى غاية البشاعة
أنا قلت له لما تأملته ساعة:
اللذة والموت علموك اللزج
وأنا علموني الفلسفة والشجن
عجبي!!!!
جالك أوان ووقفت وقفت وجود..
يا تجود بده با قلبي يا بده تجود..
ماحد يقدر يبقى على كل شئ...
مع إن....عجبي....كل شئ موجود...
عجبي!!!!
ياللى نصحت الناس بشرب النبيت
مع بنت حلوه ...وعود ,وضحك وحديت
مش كنت تنصحهم منين يكسبوا
تمن ده كله ؟؟..زوالا يمكن نسيت
عجبي!!!!
كل اللى فى الخمارة صابهم جنون
صبحوا الرجال يتبادلو كاس المنون
وبدم ونبيت انكتب ع الجدار
ا(يا ميت ندامة ع اللى قلبه حنون)ا
عجبي!!!!
يا وردة قلبي معاكي في الريح لعب..
لا تعبتي م الريح و لا قلبي تعب.......
إحنا كدة :نرتاح في صخب الجنون......
و في السكون بنخاف قوي و نترعب.....
عجبي!!!!
عيد ..والعيال اتنططوا ع القبور
لعبوا استغماية..ولعبوابابور
وباللونات..ونايلونات شفتشى
والحزن ح يروح فين جنب السرور
عجبي!!!!
ع الجسر فت الصبح تحت الضباب..
بين اللي لسه بينغرس و اللي طاب..
مااهتز قلبي لنبت طالع جديد.........
قد الي ماشي...وتحت باطهكتاب......
عجبي!!!!
وقفت بين شطين على قنطرة
الكدب فين والصدق فين يا ترى
محتار حاموت ....الحوت خرج لى وقال
هو الكلام يتقاس بالمسطره؟؟
عجبى!!!!
تسلم يا غصن الخوخ يا عود الحطب..
بييجي الربيع ..تطلع زهوركعجب.....
وانا ليه بيمضي ربيع وييجي ربيع.......
ولسه برضك قلبي حتة خشب...........
عجبي!!!!
قالوا الشقيق بيمص دم الشقيق
والناس ماهياش ناس بحق وحقيق
قلبى رميته وجبت غيره حجر
داب الحجر ...ورجعت قلبى رقيق
عجبى !!!!
ورا كل شباك آلف عين مفتوحين ..
وانا وانت ماشيين يا غراميالحزين...
لو التصقنا نموت ....بضربة حجر.....
ولوافترقنا...نموت متحسرين........
عجبي!!!!
ياللى عرفت الحب يوم وانطوى
حسك تقول مشتاق لنبع الهوى
حسك تقول مشتاق لنبع الغرام
ده الحب......مينداق منه قطره ...ارتوى
عجبي!!!!
ورد في ورق سلوفان يا حلوة اهديلك؟
و الا انقله بالطين في الشتلة واجيلك
الأولاني لو وحا بحناني
عجبي علي التاني بإيه يوحيلك
عجبي!!!!
الفيلسوف قاعد يفكر سيبوه
لا تعملوه سلطان ولاتصلبوه
ما تعرفوش إن الفلاسفة يا هوه
الي يقولوه بيرجعو يكدبوه
عجبي!!!!
سنوات وفايته عليا فوج بعد فوج
واحدة خدتنى إبن والتانية زوج
والتالتة أب خدتنى والرابعة إيه
إيه يعمل إللى بيحدفه موج لموج؟؟؟
عجبى !!!!
اوقات أفوق ويحل عني غبايا
واشعر كأني فهمت كل الخبايا
و افتح شفايفي علشان اقول الدرر
ما أقولش غير حبة غزل في الصبايا
عجبي!!!!
ياما صادفت صحاب وما صحبتهمش
وكاسات خمور وشراب وماشربتهمش
أندم على الفرص اللى انا سبتهم
والا على الفرص اللى ماسبتهمش
عجبى!!!!
أحب اعيش ولو أعيش فى الغابات
أصحى كما ولدتنى أمى وابات
طائر.. حوان ...حشرة ..بشر بس اعيش
محلا الحياة ...حتى فى هيئه نبات
عجبى !!!!
هات يا زمان و هات كمان يا زمان
غير بسمة الشجعان مامني يبان
هو اللي داق الفرحة يوم ثورته
يقدر يعود ولا ثانية للأحزان ؟
عجبي!!!!
أنا قلبى كان شخشيخة أصبح جرس
جلجلت به صحيوا الخدم والجرس
أناالمهرج ...قمتو ليه خفتو ليه
لاف إيدى سيف ولا تحت مني فرس
عجبى !!!!
غدر الزمان يا قلبي مالوش أمان
وحاييجي يوم تحتاج لحبةإيمان
قلبي ارتجف وسألني.. أأمنْ بإيه؟
أأمن بإيه محتار بقالي زمان
عجبي!!!!
رقبه قزازه وقلبى فيه أنحشر
شربت كاس واتنين وخامس عشر
صاحبت ناس م الخمرة ترجع وحوش
وصاحبت ناس م الخمرة بترجع بشر
عجبى !!!!
حبيت...لكن حب من غير حنان
وصاحبت لكن صحبه مالهاش أمان
رحت لحكيم واكتر لقيت بلوتى
إن اللى جوه القلب مش ع اللسان
عجبي!!!!
فارس وحيد جوه الدروع الحديد
رفرف عليه عصفور وقال لهنشيد
منين.. منين.. و لفين لفين يا جدع
قال من بعيد ولسه رايحبعيد
عجبي!!!!
نوح راح لحاله والطوفان استمر
مركبنا تايهة لسه مش لاقية بر
أهم الطوفان وأهين يابر الأمان
إزاى تبان والدنيا غرقانة شر
عجبى!!!!
تسلم يا غصن الخوخ يا عود الحطب
بييجي الربيع..تطلع زهورك عجب
وانا ليه بيمضي ربيع وييجي ربيع
ولسه برضك قلبي حتة خشب
عجبي!!!!
على بعد مليون ميل من أرضنا
من الفراغ الكونى بصيت أنا
لا شفت فرق مابين جبال أو بحور
ولا شفت فرق مابين عذاب أو هنا
عجبى!!!!
وسط الحطام اتفرجوا يا أنام
تمثال ملك..ومبوله مالرخام
لتنين نحتهم نفس أسطى الحجر
و كانوا ذات يوم كتلتين لسه خام
عجبي!!!!
سرداب فى مستشفى الولاده طويل
صرخات عذاب ورا كل باب عويل..
وفى الطريق متزوقين البنات...
متزوقين للحب والمواويل
عجبى !!!!
كيف شفت قلبى والنبى ياطبيب
همد ومات والا سامع له دبيب
قاللي لقيته مختنق بالدموع
وما لوش دوا غير لمسه منإيد حبيب
عجبى!!!!
عجبي عليك..عجبي عليك يا زمن
يا بو البدع.. يا مبكي عيني دماً
إزاي أنا.. أختار لروحي طريق
و أنا اللي داخل في الحياة مرغماً
عجبي!!!!
« آخـــر الـــمـــشـــاركــــات »
12-02-2016
