كل يوم!!!الشاعر الدكتور صلاح عبد الله كل يوم!!!... كل يوم بتسد باب... كل يوم تطلق كلاب... كل يوم تفتح سجون... كل يوم تقفل كتاب... كل يوم بتهين كبار... كل يوم تقتل شباب... كل يوم تزرع وعود... والوعود تطرح خراب... كل يوم نحلم ونلقى... كل أحلامنا سراب... كل يوم أحلام جنابك... كالدعاء المستجاب... كل يوم ليك دجالين... بيغرقونا في الضباب... كل يوم ليك جلادين... بيجددوا شكل العذاب... كل يوم ليك كذابين... خلوا وش الحق غاب... كل يوم ليك طبلجية... لجل يمشوا في الركاب... كل يوم عندك منافق... يتلبس زي الشراب!!!... كل يوم تهتف باسمك... مُزة خريجة آداب!!!!!!... مُزة أطرى من العجينة... جسمها من المُحن ساب!!!... كل يوم فيه شب مايص... بقه فيه أغنية راب... كل يوم ليك رأس مالي... ليه في أطماعه التهاب... سف مصر وسابنا نسأل... هو ودى ولا جاب؟!!... رَوَّقوا يا إخواننا واهدوا... كله راح ياخد مناب... كل يوم تفقعنا زنبة... لما شَعر الطفل شاب!!... كل يوم والعيشة راجعة... تاني للون الهباب... لسة برضو الحاوي حاوي... والجراب نفس الجراب... حاوي يبلع أي ثورة... ثم يطرشها انقلاب!!!... وإلي كان بالأمس لقمة... النهار دا طلع له ناب!!!... وإلي خان فاز في البلد دي... وإلي أخلص ليها خاب!!... والصواب غلطة في بلدنا... والغلط هو الصواب!!... وإلي غرقان في الخطيئة... النهار دا خد ثواب!!!... والوضيع م الفرحة يرقص... والشريف عنده اكتئاب... وفي عيونه من غرامك... دمعة العاصي إلي تاب... والنِدا ما ليهوش صدى... والسؤال ما ليهوش جواب... والحكيم قال لك يا سيدي... إيه هاتاخد م العتاب؟... اتصطل. عوم في البالوظة... تلقى راسك في السحاب... اعتبر عقمك أبوة... واعتبر عريك تياب... واعتبر شوكك حرير... واعتبر مشك كباب... واعتبر عين شمس يابا... أحلى حتة في الرحاب!!!... واعتبر إنك مرفه... مهما سفيت التراب!!!... وادفى واطمن في بيتك... مهما حسيت باغتراب... قول لعريانة بلدكم... ألف مبروك ع النقاب!!!... عيش في دور إن أنت عايش... وادعي لصحاب الجناب... وانتظر صوت البلابل... ييجي من زور الغراب!!... لا يا فرعون مش هاينفع... دا ماهوش فصل الخطاب... مستحيل راح ترعبونا... مهما سنيتوا الحراب... بكرة هاتفتح عيونك... تلقى طرح الثورة طاب... ثورة مش سكر في مية... قلبوه وفي لحظة داب... وافتري وتَقَّل حسابك... بكرة هانصفي الحساب...
ساعد في نشر والارتقاء بنا عبر مشاركة رأيك في الفيس بوك
« آخـــر الـــمـــشـــاركــــات »
02-03-2015
