وإنت بتصلي؟
حاسس بالصلاة؟
فرحان بيها؟
لامس نتيجتها في حياتك؟
لو أي سؤال من دول إجابته "لأ"،
يبقي اقرأ معايا كدة وراجع نفسك..
إنت عارف يعني إيه "يلا نصلي"؟
يعني يلا يا مسلم نكلم ربنا
يعني يلا يا مسلم نرتاح شوية بين إيدين ربنا..
وننور حياتنا..
هتقول لي "طب إزاي صلاتي تنور حياتي؟!".
تعالى نجرب نصلي سوا دلوقتي.. واحكم بنفسك..
يلا نبدأ وننزل ذنوبنا الأول في الحوض بالمية
عشان نبقى فل الفل قدام ملك الملوك..
إنت عارف يا حبيب المسلمين إن زماااان الواحد من السلف
بعد ما كان يتوضأ كان بيترعش وهو داخل على الصلاة،
فيسألوه مالك بتترعش كدة ليه؟! يقوم يرد يقول:
"إنتوا مش عارفين أنا هقف بين إيدين مين دلوقتي؟!".
خلصنا وضوء خلاص؟ وثبِّتنا على دراعاتنا ورجلينا
ووشنا النور إللي هييجوا كلهم منورين بيه
يوم القيامة إن شاء الله؟ رائع.. خد بالك بقا وركز..
إنت عارف إحنا داخلين فين دلوقتي؟
في منطقة حرام.. يعني ممنوع فيها أكل وشرب
وضحك وأي كلام إلا الذكر.. هنقف بين إيدين ربك
إللي خلقك في الدنيا دي.. مجرد ما نقول:
"الله أكبر" ونزؤ الهوا بإيدنا ورا ودانا تخيل نفسك
بترمي الدنيا كووولها بإيدك ورا ضهرك..
كووول الدنيا..
طب عارف يعني إيه الله أكبر؟
يعني مفيش أقوى منه ولا أرحم منه ولا ألطف منه
ولا أعظم منه، ولا أوسع منه ولا أجود منه،
ولا أقدس منه ولا أعز منه، ولا أعلم منه ولا أحكم منه،
ولا أعدل منه ولا أعلى منه، ولا أشد منه جبروتًا
وانتقامًا وبطشًا وقهرًا ونفعًا.. إلخ، كوووول شيء
هو سبحانه الأكبر فيه -كل شيء من إللي ربنا قاله
عن ذاته سبحانه وثبت في القرآن والأحاديث الصحيحة
طبعًا يا مسلم-.
اطفي أي دوشة وابعد عن أي ملهيات..
هيأ نفسك يا بطل للقاء الجبار الرحيم العظيم.
اختار المكان إللي تحب تصلي فيه في البيت
براحتك -لحد ما تتجدعن كدة وتكبر وتروح المسجد
على طول طبعًا-، وقبل الصلاة اختار كمان السور
إللي تحب تمررها على قلبك عشان ترققه وتجدد إيمانه
ونوره.. بس قبل ما تصلي برضو، اقف قدام المراية
وظبط لبسك كدة وشمه واتأكد من نضافته وحط عطر جميل
وفـ إيدك السواك طبعًا، إوعى تهجر سنة حبيبك
صلى الله عليه وسلم، إللي فضل متمسك بيها طول حياته
ولحد سكرات الموت عشان ينبهك أد إيه مهمة للمسلم..
طب إنت عارف إنك لو نضفت سنانك بالسواك
وقمت تصلي، المَلَك بيقوم معاك يقف وراك يسمع لقراءتك،
ويقرب منك لحد ما ياخد كل القرآن إللي خارج من بؤك
على جوفه مباشرة! طهر فمك بقى للقرآن يا بطل
كل دة بنستعد للصلاة؟! طبعًاااا.. دي أهم مقابلة فـ يومك وليلك..
يلا نساوي الصف زي ما الملايكة بتعمل.. ونقفل الفتحات
إللي بيننا كويس عشان الشياطين ماتعرفش تدخل توسوس
وتسرق حاجة من صلاتنا...
، ولما تبدأ فـ الصلاة افتكر تركز نظرك على مكان السجود
يا مسلم يا جميل، وافتكر ما تتلفتش يمين وشمال عشان ربنا
ما ينصرفش عنك وابقى تخيل نفسك يا بطل قدام الكعبة
مباشرة قبلة المسلمين، وربنا ناظر إليك..
والجنة على يمينك.. وإنت واقف على الصراط الرفيع
أوي دة.. وافتكر كويس إن جهنم تحت الصراط..
وملك الموت وراك مستنيك تخلص صلاتك عشان يقبض
روحك.. والرسول صلى الله عليه وسلم بيتفرج على صلاتك
.. تخيل يا مسلم إنها آخر صلاة ليك.. ولما تخلصها،
خليك قلقان هي اتقبلت ولا لأ أصلا! هو المسلم كدة
بين الخوف والرجاء..
وافتكر كويس جدًا إن أي شيء هتبقى قلقان عليه وإنت
في الصلاة وشايل همه هو أصلا بإيدين ربنا إللي إنت
بتصلي قدامه، عشان كدة اتوكل عليه سبحانه.. واخشع
وإنت في الصلاة.. وفضي قلبك تماااامًا من أي هم
ولو بسيط: "الكرتون إللي خايف يفوتك يا مسلم
ربنا هو إللي إداهولك.. إنت ممكن تكروت الصلاة بسرعة
ثم تلاقي النور قطع! طب التليفون إللي خايف يسكت وما
تلحقش ترد على صاحبك ربنا هو إللي خلاه يرن..
إنت ممكن تكروت الصلاة بسرعة وبرضو تيجي ترد تلاقيه قفل!
اللعبة إللي خايف إن المحل يقفل أو حد يسبقك ويشتريها قبلك
ربنا إللي هيحفظهالك لو هي رزقك".. كوووول دة رزق أصلاً
بيد الله.. ربنا قال عن الصلاة:
{وَاصْطَبِرْ عَلَيْهَا لَا نَسْأَلُكَ رِزْقًا نَّحْنُ نَرْزُقُكَ}
[طه من الآية:132].
طب عارف إن ربنا يسرلك الصلاة؟ ربنا سبحانه
عمل لك رخص عشان الصلاة عمرها ما تبقى تقيلة عليك.
. مش بس كدة، دة سبحانه بيحب إنك تعمل رخصه دي
وتستمتع برحمته.. عندك الصلاة في النعل مثلاً، مش في الشارع
بس! عندك المسح على الجورب مثلاً، مش في البرد بس! أبدًا والله.
. اتعلم إنت بس شروطهم وموانعهم وتابع نفسك لحد ما تتعود
على خمس مسحات فقط في غير السفر، مش
مسحة يا مسلم خلي بالك.. كمان مفيش مانع من الوضوء
بالمية الدافية ساعات كدة، بس بلاش تعملها على طول يا بطل،
عشان النبي صلى الله عليه وسلم وصانا بالخشونة عشان
النعيم والنعمة مش بيدوموا، النبي صلى الله عليه وسلم
عاوزك تبقى مجاهد قوي تتحمل كل حاجة..
بدأت الصلاة خلاص آهو؟ الحمد لله...
حط إيدك كدة، اليمين عالشمال..
دة أدب قدام الملك سبحانه..
وبلاش تفرك كتير في الصلاة..
عارف سيدنا عمر قال إيه
عن إللي بيفرك كتير في الصلاة؟ قال عنه:
"لو خشع قلبه لخشعت جوارحه"....
ابدأ يلا بالفاتحة.. طب عارف قصة الفاتحة؟
وإنها مقسومة نصين بيننا وبين ربنا؟ وإن ربنا بيرد
على كل آية؟ جربت تركز في الفاتحة وإنت بتقراها
بالمعنى دة وتتخيل الحوار الجميل أوي دة؟!
تقول الحمد لله رب العالمين، ربنا يرد عليك "حمدني عبدي".
تقول الحمن الرحيم، ربنا يرد عليك "أثنى عليّ عبدي".
تقول مالك يوم الدين، ربنا يرد عليك "فوّض إليّ عبدي".
وتكمل لحد آخر السورة وربنا يرد عليك برضو "
هذا بيني وبين عبدي ولعبدي ما سأل"،
فيه إيه في الدنيا يا مسلم أحلى من كدة..
طب عارف معنى المغضوب عليهم ولا الضالين؟
لو عرفت معنى الفاتحة كلها هتعرف إن كل الدين تقريبًا جواها..
وهتحبها أوي.. وهتفرح بصلاتك.. وهتتغير حياتك بجد..
إن شاء الله.. وخد بالك من "خنزب"، حرامي الصلاة
الخبيث دة.. واطرده بالخشوع عشان يرجع مفلس
ماعوش حاجة مسروقة من صلاتك
مش أنا بقولك إلا صلاتك...
دة الصلاة دي من آخر الحاجات إللي حبيبك النبي
صلى الله عليه وسلم وصّى المسلمين عليها وهو بيموت،
في عز ما كان بيتصبب عرقًا من أثر سكرات الموت
صلى الله عليه وسلم، قعد ينبه عالمسلمين كلهم كتير عليها
كان بيقول لهم "إلا صلاتكم إلا صلاتكم".. معقولة تضيعها!
اركع واسجد يلا..
في الركوع حقق حروف التسبيح والاستغفار ببطء
وسكينة وصوت لا عالي ولا واطي، عشان تمررها
على قلبك وتغسله.. -همس مسموع لا أكثر:
بين ذلك سبيلا
وما تنساش تستغفر من كل غلطاتك،
مع التسبيح المعروف طبعًا..
وفي السجود برضو، حقق حروف التسبيح بالراحة
وحس بالسكينة في حركاتك وكلماتك، وطوّل في السجود..
دة أقرب مكان بنكون فيه من ربنا.. طوّل بقا وادعي ب
كووول إللي نفسك فيه.. وياريت كل دعاويك تكون
أخروية لإنك مسلم مؤمن بالغيب وتحمل هم الآخرة
على الدوام.. وما تنساش تدعي لنفسك تحفظ القرآن
وتفهمه وتعرف تبلغه، وطوّل في الركوع كمان
ما تخطفهوش كدة.. إنت عارف إنك أول ما بتركع
أو تسجد، كل ذنوبك الباقية إللي ما نزلتش قبل الصلاة
مع ماء الوضوء، بتتحط فوق كتافك وطول ما إنت راكع
وساجد تفضل الذنوب دي تتساقط عن عاتقك بإذن الله!
عشان كدة الصلوات الخمسة كفارات لما بينهن لو ما إنت
ما عملتش كبائر إن شاء الله.. خد بالك بقا يا بطل..
قول التشهد يلا.. طب عارف معنى التشهد؟ عارف أهميته
عند النبي صلى الله عليه وسلم؟ طب عارف إن النبي علمه
لسيدنا عبد الله بن مسعود وهو ماسك كفه بين إيديه الشريفة
صلى الله عليه وسلم -يا بختك يا سيدنا عبد الله-!
وكان كإنه صلى الله عليه وسلم بيعلمه سورة من القرآن
مش كلام عادي! طب عارف إنك لما تقول "السلام علينا
وعلى عباد الله الصالحين" إنك كدة سلمت على كل العباد
الصالحين في الأرض... الله عالصلاة
أتم حركات وهيئات الصلاة كلها بشكل عام..
أتم القيام.. وأتم الركوع.. وأتم الجلوس...
اطممممممن في صلاتك.. زي ما قال حبيبك
صلى الله عليه وسلم "حتى تطمئن..."،
اعمل هيئة الصلاة النبوية بالظبط..
«صلوا كما رأيتموني أصلي»
(صحيح الجامع:893)،
اشتري كتيب محقق عن هيئة صلاة النبي،
واقرأه وطبق منه كل يوم جزء لحد ما تتقنها زي اسمك.
خلصت صلاة خلاص بفضل الله ورحمته؟
استشعر عظمة النعمة إللي ربنا مكنك منها
وحرم منها ناس تانية.. نعمة الصلة بالله والطمأنينة
بذكره والفرار من الدنيا إلى الصلاة.. وابتسم ابتسامة
رضا وفرحة كبييييرة وإنت لسة قاعد عالأرض وقول لنفسك:
"الله عالراحة والجمال.. قلبي فرحاااان.. له حق حبيبنا
النبي صلى الله عليه وسلم يقول الصلاة دي حب حياته
وقرة عينه.."، -هتتبرمج بالتكرار..
وهتحس فعلاً بحجم النعمة-.
صمم جدول أسبوعي لنفسك بمواقيت الصلاة بالساعة بالظبط،
وحط خمس خانات مثلاً لكل فرض
(1- النضافة والطهارة. 2- الصلاة على وقتها.
3- إتمام الحركات. 4- عدم الحركة كتير.
5- فعل سننها قبل وأثناء وبعد الصلاة)،
وكل خانة في الخمسة دول تاخد نجمة بلون مختلف
لو اتعملت.. لكل فرض بالترتيب.. وتعد النجوم
آخر الأسبوع -نجوم الإنجاز مش نجوم الليل-
وتشوف أكتر لون متحقق في الجدول وأكتر لون ناقص عندك
-ارتباط ذهني بالصورة مهم ليك جدًا-..
وخلي الجدول القديم محطوط جنب الجدول الجديد عشان
يبقى عندك حافز للتحسن.. وفكر نفسك دايمًا إن الجدول
دة هيبقى فيه واحد زيه في صحيفتك إللي هتمسكها فـ إيدك
يوم القيامة.. ربنا يجعل فيها ما يسرك.
في حالة إنك صليت لوحدك مثلاً، ولقيت نفسك لكلكت الصلاة،
اقعد مع نفسك وأدبها وقول لروحك:
"عارف النبي صلى الله عليه وسلم قال إيه على صلاتك دي
بالظبط؟! قال إنها نقر زي نقر الغراب للأرض.
. طب عارف النبي عمل إيه مع إللي صلى زيك كدة؟ خلاه
يعيد الصلاة كذا مرة لحد ما صلى عدل.. يلا يا مؤمن
ارجع فصل فإنك لم تصل".
طب بتتأخر ساعات عن الصلاة؟ ليه تتأخر عن الصلاة
بعد الأدان وتسيبها لحد الصلاة إللي بعديها؟! كدة تتأخر
على أكتر عمل ربنا بيحبه "الصلاة على وقتها".. قوم استغفر
يلا واستغيذ من إبليس وصلي.. لعل ربنا يمسحلك التأخير
دة ويكتبك من السابقين المسارعين في طاعته...
بتسيب صلاة الجماعة ساعات؟ يا خبر! بقا معقوووول
حد عاقل يخيروه إن صلاته تتكتب مرة واحدة ولا 27 مرة،
يقوم يختار بكامل إرادته إنها تتكتب مرة واحدة! ياااا راااجل..
يلا قوم استعيذ وتعالى جنبي نصلي سوا ..ويا سلام
لو تنزل تصليها جماعة في المسجد بيت أكرم الأكرمين
عز وجل، تبقى فزت بأوسع كرم ضيافة شافها إنسان..
إوعى تفوت ضيافة الرحمن لحبايبه في بيته عز و جل،
مش هتلاقي أبدًا يا مسلم حد في كرم ربنا سبحانه..
أنا مش هضحك عليك وأقولك إن الصلاة جماعة
في المسجد فرض، لأ.. حكم الصلاة في المسجد فيه خلاف
معتبر، كلنا عارفين وأكيد إنت كمان عارف.. لكن يا بطل،
المسلم الحق متبع لكل السنن بغض النظر عن حكمها..
كفاية أوي للمسلم الحقيقي إنه يعرف إن ترك الصلاة في المسجد
شيء بيزعل النبي جدًاااا لدرجة إنه صلى الله عليه وسلم
كان بيتمنى يجيب حد يقف مكانه في صلاة الجماعة عشان
يروح هو على الرجال إللي بيصلوا بلا عذر في البيوت
عشان يولع في بيوتهم نار عليهم وهما فيها.. وكفاية
أوي للمسلم الحقيقي إنه يعرف إن الناس كلها يوم القيامة
خارج ظل عرش الرحمن -يوم تدنو الشمس الملتهبة
من الرؤوس- إلا سبع أصناف من البشر، من ضمنهم رجل قلبه
معلق بالمساجد.. الكلمتين دول كفاية عند إللي
بيحب ربنا بجد يا بطل..
وأخييييرًا...
لازم تعرف إن أول حاجة هتتحاسب عليها هي الصلاة..
لو فسدت، يبقى باقي عملك الصالح فسد ودفتر أعمالك
الصالحة مش هيتبص فيه أصلاً ، لازم تعرف
إن السنن الرواتب عشانك إنت مش عشان حد تاني،
لإن إللي ناقص من صلاتك ينجبر بالسنن..
ومن فينا صلاته كاملة!
لازم تعرف إنها عمود الخيمة الكبيييرة..
هات ملاية كدة وحط تحتها عصاية واقفة، وشيل العصاية
وإنت تشوف إزاي البناء بينهار من غير العمود..
من أقامها فقد أقام الدين.. ومن هدمها فقد هدم الدين..
وكل ما توقع الصلاة افتكر تقول لنفسك: "بتهد الخيمة
كلها كدة على دماغك يا مؤمن ".
لازم تعرف إن ديننا خلا الصلاة حل لكل المشاكل:
عندك حيرة، فيه صلاة الاستخارة.. عندك طلب، فيه صلاة الحاجة..
عندنا كسوف للشمس مرعب، فيه صلاة للكسوف.. عندك صدقات
أد كدة لازم تؤدي حقها، فيه صلاة الضحى تتصدق بها عن
كل مفصل في جسمك يوميًا.. عندك جفاف في البلد والمية
شحيحة، فيه صلاة استسقاء لجلب الأمطار برحمة ربنا..
عندك قلب تعبان، فيه صلاة قيام تروق البال وتصفي النفوس
وتغسل القلوب..
لازم تحس بالفخر من إن ديننا الدين الوحيد إللي المسلمين فيه
بيتصلوا بخالقهم خمس مرات في اليوم، وإللي يزود بسنن
هو الكسبان.. ومن يبخل فإنما يبخل عن نفسه..
وصدق من قال: "عجبت لمن يبحث عن السعادة
وعنده خمس صلوات في اليوم والليلة"